YA REBBI TEHDINA
داكشي لي كنت خايفة منو بصاح كاين. مافيها نقاش. جات الفاس فالراس. سبحان الله.كان دائما عندي إحساس قوي بأن راجلي مبقيت كنعني ليه والو من غير أنني أم الوليدات. مكيشوفش فيا المرا أو ماعندو حتى رغبة من جهتي. دابا، هدشي مبقاش مجرد إحساس، هدا يقيييين. هدشي بصاح. إحساس صعيب هدا، منتمناه لحتا مرا، ضربة قاضية للأنوثة ديالها.
آآآشناهو الحل؟؟؟؟
بالنسبة ليه الحل هو الزواج! غادي إتزوج بمرا أخرى حيث بيناتنا مشكل في العلاقة الحميمية. إذن غادي إتزوج من أجل المتعة فقط. واخا. أنا مغاديش نحرم ما أحل الله، و لكن واش هادي هي مؤسسة الزواج؟ واش هدشي علاش مولانا شرع التعدد؟؟؟
عييت منفكر أو نكول مع راسي مافيها والو و لكن الله غالب أو مافهمتش شحال من حاجة
أولا: واش المشكل الجنسي كيعيشو بوحدو؟ طبعا لا. حتى أنا عندي رغبات أو حتى أنا كنعاني منو. بالعكس أنا عندي رغبة فراجلي، هو عندو الرغبة موجودة ولكن ماشي فيا، فشي مرا أخرى. إذن ملي بجوجنا كنعانيو، واش خاصنا حل كيرضي الطرفين أولا حل كيرضي طرف واحد؟
ثانيا: أنا كنت دائما كنقول مكينش زواج ناجح بدوم علاقة حميمية ناجحة، هو كيقول ممكن الإنسان يكتفي بالأشياء الأخرئ لي فحياتو أو يقنع بيها. و في نفس الوقت كيقول ماغاديش إقدر إعش هكدا حياتو كاملة، شي نهار غادي يخوني! هذا تناقض، و الرغبة ديالو فالزواج كتأكد هاد التناقض, أو لا؟ و في المقابل مطلوب مني أنا نكتافي بحب أولادي أو نعوض بيه النقص فحياتي كأنثى أو مرا. مطلوب مني ندير شي حاجة أنا رافضة المبدأ ديالها أصلا أو منقدرش عليها!
ثالثا: كيقول معندوش إحساس من جهتي حيت نقدر نحمل رغم الإحتياطات, كيفاش غادي يتغلب على هاد الخوف مع وحدة أخرى؟ كيفاش غادي ايدير متحملش؟ آشمن طريقة عندو أنا معارفاهاش؟ آشنو كيدار أكتر من لي درت؟ هاد الخوف المرضي مخاصوش علاج؟؟
رابعا: أنا يلاه عندي ٣٤ عام. أو كنعتبر راسي الحمد لله في أوج الشباب و الإحسس بالأنوثة. أنا عاد بديت كنحس براسي مرا عندها رغبات بعدما ساليت من الحمل أو الولادة. دابا مطلوب مني في هاد السن ندفن هدشي بإسم التضحية. واش هادشي معقول؟ واش محاملش إمسني وانا مراتو الوحيدة غادي إقرب ليا ملي تكون عندو مرا جديدة؟ أوكلنا عارفين حلاوة الحاجة ملي كتكون مازال جديدة!
خامسا: الرغبة و المتعة و الشهوة دائما فالأوج ديالها في بداية أي علاقة. ملي إيدوز تاني
شي وقت علا المرا التانية أو متبقى تحس بوالو من جهتها آشنو نديرو؟
سادسا: واش فعلا هدا هو الحل؟ مكينينش شي حلول اخرى نقدرو نجربوها؟ منقدروش نستاشرو مع شي واحد كيفهم ف هادشي إيقول لينا واش هادشي كيوقع للناس واش ليه الحل أم حالة ميؤوس منها. أم هادشي من الطابوهات؟ واش راجلي بصاح بغا إلقا حل باش نفوتو هاد الحنة أولا بغا هاداك الحل بالضبط لي مسلكو؟
سابعا: أو هدا هو المهم . أنا باقا الحمد لله صغيرة أو بصحتي أو باغي اتزوج عليا حيت ناقصاه شي حاجة مالقاهاش عندي. إيلا شي نهار، لا قدر الله، مرضت أولا تصابيت فالجمال ديالي أو مقدرش إيلقا عندي النص ديال لي عندي دابا، آآآشنو غادي يبغي إيدير؟ آآشنو غادي يطلب مني؟ هادشي مكيطمئنش أو كيخليني نفقد الإحساس بالأمان من جهة المستقبل
دابا لي حنا الحمد لله إمكن لينا بجوجنا نلقاو لحل بيناتنا لراسنا بغا يجيب وحدا، ملي لا قدر الله ميكون بيدينا منديرو آش من حل غادي يلقا؟.
واش هادشي معقول أولا لا؟ واش أنا عادية أملا لا؟ آآشنو المعمول؟ الفراق؟ ديك الساعة بعدا حتى إيلا عشت لأولادي نكون بلا راجل، ماشي كنعس مع واحد فنفس الناموسية أو نقول براكا عليا أولادي.
المهم و المؤسف ف هادشي كولو، هو، حتى إيلا مدارهاش حيث مبغيتش الفكرة باقية كاينة. أو تخيلو إحساس المرا عايشة مع راجل أمنيته إتزوج بمرا خرا إيعيش معاها لحظات متعة محاسش بها معها. تخيلو إحساس المرا عايشة مع راجل قاليها إيلا متزوجتش عليك ممكن نخونك شي نهار.
باراكا عليا دابا قلبي ضرني